يوميات فتاة غير مناضلة

2
202

كتاب جديد لهويدا، محمل بالمشاعر والتاريخ والآمال…حديث وممارسة للثورة….ثورة في القلب وثورة في الشارع وثورة في الكتاب
متوفر في مكتبة عليسة البالماريوم – تونس، و قريبا بالمكتبات داخل الجمهورية.

مقتطف

 

نابل جانفي 1978


-هو:انت نزوح !
روحي لبلادك !
ما تلعبش معانا!
-هويدا ان مود تكريز: انا تونسية و بلادي من غمراسن لكاب زبيب
و انا في القيروان في بلادي و في قابس بلادي و هنا في بلادي
ما عندي وين نروح
انت كان موش عاجبك برة زمر هانوا البحر اشرب منوا .
و كانك على الكورة العب وحدك
انا نلعب خير منك و منو
نلعب مع الحيط خير ما نلعب معاكم
على الاقل هو يرجع الكورة .
نزوح !
اي نعم نزوح
خاطرني نسكن في مركز الحرس الوطني الي لاهي بالنزوح في الوطن القبلي
دارنا في المركز .
كل صباح نهبط الدروج ,نتعدى على الحبس
نقول صباح الخير للاولاد الي رفلهم الحاكم و البطالة الي ما عندهم وين يسكنوا الي يحطوهم في الحبس باش ما يراوهمش التوريست
ساعات بابا يجيب بنات يباتوا عنا في الدار
بنات ضايعة تلوج على خدمة
يتكلموا بدارجة تعجبني وقت يغنيوا غنايات ما يتعداوش في التلفزة.
اي نعم انا نزوح .
نتعدى على المركز نحيي العلم
نغزرلوا يتمايل هو و الريح
بابا يقول الي وقت نغزروا للعلم نغزروا لفوق و نهزوا روسنا و خشومنا و هذيكة هي تونس كي تهز راسك و ما تيحش غزرتك.
نغزر لعلم ما نعرف كان هو
علم غناولوا برشة توانسة و هزوه لفوق و ماتوا على خاطروا
بابا ديما يحكيلي على بنزرت
على صحابوا الي ماتوا
على تونس الي غلبت فرنسا بسلاح واحد :اولادها.
تربيت في مركز تي أصلا تولدت في مركز في بلاد صغيرة في جبل
في ولاية باجة
على هذاكا زعمة قالي نزوح ؟
اموروا !
انا تونسية و كان موش عاجبوا امورو

2 Commentaires

  1. Un condensé de sentiments ….je viens de le finir …

    On découvre une autre Tunisie ….C’est à lire ,en plus le dialecte se marie avec l’arabe littéraire à l’image de notre pays

LAISSER UN COMMENTAIRE

Please enter your comment!
Please enter your name here